6404 hits

Poemas inéditos de Álvarez Blázquez e outros que formaban parte xa do libro Roseira do teu mencer conforman o poemario O que ben che quer que editou a editorial OQO, e que contén ilustracións da filla do autor homenaxeado, Berta Cáccamo.

O salón de plenos de Melide acolleu ás oito deste serán a presentación desta obra que no día de onte a Concellería de Cultura de Melide entregou a todos os nenos e nenas de Melide.

 O acto desta tarde, aberto ao público, contou coa presenza da artista e editora de OQO, Eva Mejuto, amais de coa alcaldesa, Socorro Cea, a concelleira de Cultura, Conchi Castro, e outros membros da corporación municipal. Malia que nun primeiro momento estaba prevista a asistencia dos fillos do autor, Xosé María e Berta Álvarez Cáccamo, estes non puideron asistir debido a un problema de saúde que os mantén lonxe de Galiza. Neste acto central da Semana das Letras e das Artes de Melide, realizouse un percorrido pola vida e obra de Álvarez Bláquez, a través de imaxes e vídeos compostos para a ocasión, nos que se puxo de manifesto a súa valía como arqueólogo e escritor. Nestas pezas audiovisuais puidose contouse coa intervención de Berta Cáccamo, filla do artista e pintora de grande recoñecemento que achegou as ilustracións a esta obra do seu pai.

Na súa intervención, a concelleira de Cultura, Conchi Castro, lembrou que o programa elaborado pola súa concellaría con motivo da celebración do 17 de maio “quere ir máis aló desa data simbólica, e espallar ao longo de toda a semana actos culturais que non só se centren na literatura, senón noutras manifestacións artísticas”.
Neste senso, cómpre lembrar que o Concello de Melide pechará esta semana festiva coa charla “Da tradición oral ao álbum ilustrado”, a cargo da artista Eva Mejuto, que fará un percorrido pola importancia do conto oral na nosa tradición.

Manifestación a prol da lingua

O vindeiro domingo, 18 de maio, celebrarase na Alameda de Santiago de Compostela unha manifestación convocada pola Mesa pola Normalización Lingüística, para reivindicar a situación da lingua galega. O Concello de Melide, que xa manifestou a súa adhesión a esta manifestación e ao manifesto que con tal motivo emitiu a Mesa, anima a todos os veciños e veciñas a participar neste acontecemento, para o cal disporá un autobús gratuíto que viaxará a Santiago. O autobús sairá ás 10.30 horas da mañá do domingo da habitual parada do autobús da empresa Freire.
Fonte concello de Melide