Máis de vinte mil quilos de plásticos agrícolas serán tratados para a súa reciclaxe grazas a un programa desenvolto polo Concello de Melide e que ten por obxectivo eliminar estes restos, fundamentalmente agrícolas, dos vertedoiros ilegais e dos contornos domésticos.
O amoreamento de plásticos procedentes de silos agrícolas e doutras tarefas do campo resultan un problema de difícil solución para os labregos, dada a difícil capacidade de deterioro destes materiais. Por iso, e para evitar o amoreamento de plásticos en vertedoiros incontrolados ou provocando contaminación visual a carón dos domicilios e explotacións gandeiras, a Concellaría de Medio Ambiente promoveu unha campaña de recollida de plásticos agrícolas establecendo un calendario para todas as parroquias. Durante un mes, un vehículo municipal  encargouse da recollida destes materiais, que os veciños, informados por un bando municipal, foron depositando nos campos da festa.
O concelleiro de Medio Ambiente, Manuel Prado, amosou o seu “agradecemento á veciñanza, que coma sempre colaborou con todas as campañas que se promoven dende o Concello a prol da reciclaxe e o coidado do entorno”. Fonte Concello de Melide