6561 hits

Os veciños da rúa Alexandre Bóveda recibirán un tríptico editado polo Concello sobre a figura deste ilustre intelectual galego.
A iniciativa continuará nas vindeiras datas centrándose noutras rúas, como a Concepción Arenal.

O Concello de Melide vén de poñer en marcha o programa Coñece a túa rúa, unha iniciativa que consiste en dar a coñecer aos personaxes ou feitos que dan nome ás rúas da vila. A través desta acción, o Concello quere poñer en valor a traxectoria vital de moitas persoas que están presentes no rueiro melidense a pesares de que en moitas ocasións se descoñece cales foron os motivos que os fixeron merecedores de dar nome a una rúa.

A través do programa Coñece a túa rúa, a alcaldía está a remitir envíos postais específicos para cada rúa, sendo Alexandre Bóveda a primeira para dar comezo a esta iniciativa. Así, os veciños desta céntrica rúa de Melide recibirán nos vindeiros días unha carta da alcaldía acompañada cun tríptico no que se fai un breve percorrido pola traxectoria de Alexandre Bóveda, un dos políticos e intelectuais galegos máis sobranceiros da historia de Galicia que morreu fusilado no 1936.

A rúa Alexandre Bóveda adquiriu esta nova denominación o 17 de agosto do pasado 2007, xa que ata ese momento era coñecida como Avenida Martín Freire. Para a alcaldesa de Melide, Socorro Cea, “o nome da rúa na que vivimos non está escollido nunca por casualidade, senón que imprime unha pegada de identidade e historia a ese lugar”. A campaña Coñece a túa rúa continuará nas vindeiras datas coa rúa Concepción Arenal.
Fonte concello de Melide