2808 hits

O local de ensaio de Melide, que no seu día impulsara a Vicepresidencia da Xunta de Galicia, é xa unha realidade. A alcaldesa de Melide, Socorro Cea, e a concelleira de Mocidade, Anabel Ramos, presentaron unha xornada de formación impartida por un enxeñeiro de son e dirixida aos membros dos grupos de música que xa solicitaron o uso do local.

Polo momento xa son cinco as formacións musicais de Melide que entraron na quenda de horarios fixada polo Concello para o uso do local de ensaio. Entre elas atópanse bandas de rock, de música alternativa, de metal, charangas e música folk. O enxeñeiro encargado de achegar as primeiras indicacións técnicas do local de ensaio de Melide aos seus usuarios destacou “a enorme calidade da infraestrutura en canto a insonorización e estudo dos espazos”, e insistiu en que “o local de ensaio de Melide está á altura de calquera estudo de gravación profesional, e perfectamente equipado para a gravación dun disco de calidade”.
O local de ensaio de Melide está dividido en dúas salas operativas: unha sala de ensaio e outra de mesturas e gravacións. Entre o equipamento da sala de control atópanse amplificadores para guitarra eléctrica, acústica e baixo, mesa de mesturas de 16 canles, 16 micrófonos vogais ou un ecualizador gráfico de 30 bandas. A outra sala, ideada directamente para a gravación e o ensaio, conta con batería semiprofesional acústica, un xogo de platos semiprofesionais, cabezal de ampliación de guitarra, modeladores de guitarra e de baixo e un piano entre outras pezas.

Socorro Cea presentoulles o local aos membros dos grupos musicais como “unha infraestrutura necesaria para a alta calidade e cantidade de formacións musicais que ten Melide”, e pediulles que coiden do local e de todo o material que dende esta semana se pon a disposición de todos os melidenses. A fin de organizar o seu uso, o Concello de Melide, a través da concellaría que dirixe Anabel Ramos, contactou cos grupos e asociacións musicais de Melide para que estes informasen de cales son os seus horarios de preferencia para o uso do local. Con esta información, o local de ensaio de Melide comezará a funcionar xa o vindeiro luns.
O pasado ano, o anterior Director Xeral de Xuventude, Rubén Cela, asinara en Melide un convenio de colaboración polo cal a Dirección Xeral de Xuventude  achegaba 112.000 euros para a posta en funcionamento deste servizo

Fonte boletín de Novas do concello de Melide