O ano novo comeza no Concello de Melide cunha ampla oferta de actividades de saúde e lecer para os maiores. A concelleira de Benestar e Igualdade, a nacionalista Casé Rodríguez, avanzou que se trata “dunha proposta que busca satisfacer as demandas de ocio dos maiores, ao tempo que inculcar hábitos de vida saudables”.

Dende mediados de mes, no mesmo Centro de Servizos Sociais de Melide impartiranse sesións de masaxes e acupuntura dirixidas a todos os socios e socias do Centro, que soliciten a súa inscrición. Esta programación desenvolverase ata o mes de xuño, un día á semana. Por outra parte, a concellaría de Benestar e Igualdade tamén ofrece aos maiores a posibilidade de participar nun circuíto termal no Balneario de Pambre (Palas de Rei). Casé Rodríguez destacou que “este tipo de actividades adoitan ser moi ben acollidas entre a poboación maior, posto que son un aloumiño á súa saúde”.

O circuíto termal, tamén dirixido a socios do Centro Social, realizarase entre o 20 de xaneiro e finais de marzo, todos os luns e os martes. Para esta actividade poderán inscribirse un total de 40 persoas, que participarán no circuíto en dúas quendas de 20 cada unha, aínda que antes deberán tamén formalizar a súa inscrición no Centro Social.