5139 hits

A biblioteca pública municipal Xosé Vázquez Pintor de Melide celebrou no 2007 o seu trinta aniversario. Con tal motivo, durante ese ano desenvolveuse na biblioteca unha programación especial de actividades encadradas nun proxecto titulado BIBLIOTECA PÚBLICA DE MELIDE  1977-2007. Este proxecto vén de ser recoñecido cun dos premios María Moliner, que conceden o Ministerio de Cultura e a Federación Española de Municipios O premio, que está dotado con 200 títulos, ademáis de contribuir a actualización do  fondo que ascende xa a 18.000 volumes, ten como obxectivo incentivar as accións de animación á lectura, a eficacia  no  labor bibliotecario e  a integración social nas bibliotecas de concellos de menos de 50.000 habitantes.

A Biblioteca Pública Municipal de Melide creouse no ano 1977, e dende entón desempeña un papel fundamental no eido cultural e educativo, non só no Concello de Melide senón en todos os que integran a comarca da Terra de Melide. Non en van, son moitos os veciños/as destes concellos que se achegan a consultar, facer traballos, investigar,  solicitar en préstamo calquera dos seus fondos ou facer consultas en internet. A Bibliotecaria municipal dende o ano 1977, Ánxela López, organiza numerosas actividades ao longo do ano para os máis pequenos e que agora ten o seu recoñecemento público.

Os máis de 18.000 volumes, 6 puntos de consulta en internet e 3.181 usuarios suscritos ao préstamo cos que conta nas dúas seccións ben diferenzadas (adultos e infantil) avalían unha constante preocupación pola formación,  educación e información  dos usuarios, sen esquecer a parte lúdica.

Os centros de ensino dos distintos concellos da comarca: CEIP Virxe do Portal de Sobrado; CEIP de Toques; CEIP nº 1, CEIP Martagona, CEIP Mestre Pastor Barral e IES de Melide; CEIP Arcediago e CEIP Visantoña de Santiso dedican  cada ano días exclusivos a visitar a  biblioteca.

Por outra banda, o Concello de Melide programa conxuntamente coa biblioteca municipal numerosas actividades culturais para o público infantil, e coordina publicacións, seminarios, cursos, concursos de debuxo, pintura, carteis, xadrez, representacións teatrais, programas de radio e un longo etcétera, que configuran un currículum de programas organizados para fomentar a  lectura principalmente.

A necesidade de crear hábito de lectura aos vecinos/as, e principalmente facer nenos/as lectores/as foi unha constante preocupación para a biblioteca de Melide, desde que naquel ano 1977 “aterran” os 2.500 volumes cos que o Ministerio de Cultura e o Concello de Melide crean  esta institución municipal.

O premio Marina Moliner foi acollido pola concelleira de Cultura, Conchi Castro con grande satisfacción, xa que “supón o recoñecemento a un traballo constante do departamento de cultura e da bibliotecaria a prol do fomento da lectura, no que hai pasado, presente e sobre todo moitas liñas de actuación tendidas xa cara o futuro”.  Ao mesmo tempo, a concelleira nacionalista tamén insistiu en que “sería desexable que este premio sirva como novo reclamo para futuros lectores, e facer da biblioteca un punto de encontro de lectura e de intercambio cultural”.

Fonte da nova: boletín concello de Melide.