4481 hits

Chegado o mes de novembro, no que toda Galiza se enche de magostos, o Concello de Melide vén de dar a coñecer que o vindeiro sábado 8 de novembro renderá a súa homenaxe a esta festa popular tan arraigada na identidade galega. Dende as 20 horas, a Concellaría de Cultura que dirixe a nacionalista Conchi Castro convidará a todos os veciños e veciñas a degustar as castañas e a participar de toda a festa que se crea derredor do magosto.

O Concello instalará nos xardíns unha carpa na que se elaborarán os cucuruchos das castañas asadas. Ademais, dende as cinco da tarde habilitarase nesta carpa unha área de xogos para nenos. Tampouco faltará a música, que virá da man do grupo de música tradicional Alén do mar, que ten previsto actuar no Cantón de San Roque para amenizar o magosto. Dende a Concellaría de Cultura estase a traballar tamén nun programa de actividades a desenvolver ao longo da tarde con motivo da celebración desta tradición.

A recuperación do magosto é unha iniciativa que a concelleira de Cultura, Conchi Castro, considera “imprescindible dentro da nosa cultura como galegos, e máis sendo a comarca de Melide unha zona na que a castaña é un produto abundante e dunha exquisita calidade”.

Fonte envío de novas concello de Melide