4592 hits

Dende mañá martes, e ata o xoves 30, a Consellería de Medio Rural organiza en Melide unhas xornadas destinadas a informar aos protagonistas do medio rural das distintas liñas de axudas á que poden acollerse para mellorar e facer máis rendibles as súas explotacións.

O martes, ás 10 da mañá, o director xeral de Estruturas e Infraestruturas Agrarias, Xosé Carballido Presas, inaugurará estas xornadas, que clausurarán o vindeiro xoves o conselleiro de Medio Rural, Alfredo Suárez Canal, e o vicepresidente da Xunta de Galicia, Anxo Quintana.

Na primeira xornada, que se desenvolverá entre as 10 e as 19 horas técnicos e cargos da Consellería informarán das axudas a novas incorporacións da mocidade ao rural, axudas da Unión Europea, tramitación de solicitudes por vía telemática e sobre os procesos de seguimento, control e inspección das axudas.

A Consellería de Medio Rural escolleu Melide para a celebración destas xornadas por ser esta unha comarca na que o ámbito da economía agraria ten un peso moi elevado. Todo o programa das xornadas, que se celebran no Hotel Carlos 96, pode consultarse na web de Medio Rural ou do Concello de Melide. Os técnicos deste ámbito, propietarios ou traballadores de explotacións agrarias que desexen acudir a estar xornadas, poden facelo estes días en Melide. A organización contempla ademais o convite ao xantar nos dous primeiros días.

Fonte boletín de prensa concello de Melide