|
CREASE EN MELIDE A AGRUPACIÓN VOLUNTARIA GALICIA CENTRAL DE CONCELLOS
|
| (08/04/08) escrito por Antonio |
 A primeira agrupación voluntaria de municipios que se crea en Galicia ten xa dende esta tarde un nome propio. Será Galicia Central, o nome que esta tarde fixeron público os catro alcaldes dos concellos integrados na agrupación: Melide, Lalín, Monforte e O CarballiñoEsta entidade, pioneira en Galicia, deu os seus primeiros pasos a mediados de febreiro, cando os catro alcaldes deron a coñecer a súa intención de crear unha plataforma de colaboración para desenvolver políticas e proxectos comúns aproveitando as particularidades de cada un destes catro concellos do interior de Galicia, todos eles cunha importante pegada rural.
No día de hoxe, Socorro Cea (Melide), Xosé Crespo (Lalín), Severino Rodríguez (Monforte) e Carlos Montes (O Carballiño) mantiveron unha xuntanza de traballo en Melide para seguir avanzando na elaboración de proxectos comúns. Así, Socorro Cea adiantou que “Galicia Central, encargará en primeiro lugar un estudo estratéxico no que se poñan de manifesto cales son as posibilidades reais de colaboración e os eidos que ofrecen maior potencialidade de acción para dar beneficio á suma dos habitantes dos catro municipios”.
A alcaldesa de Melide expuxo cales son os proxectos que Galicia Central ten xa en marcha: un concurso fotográfico con imaxes dos catro concellos, folletos turísticas con rutas programadas para escolares, ou intercambios nos campamentos de verán entre as catro localidades son algunhas delas. Por outra banda, o grupo de traballo de Galicia Central encomendou a cada unha das localidades unha acción localizada de cuxa organización se encargará cada concello.
Así, Monforte acollerá en agosto un festival de pop-rock con grupos locais das catro localidades. En setembro, O Carballiño organizará unha andaina de sendeirismo con paradas de interese turístico, e Lalín acollerá un festival de bandas de música no que participarán os grupos de Melide, O Carballiño, Monforte e o anfitrión da terra do Deza.
Pola súa parte, o concello de Melide aproveitará a Semana da Música, que ten o seu día grande na festividade de Santa Cecilia -29 de novembro- para acoller un Encontro de Corais, no que se darán cita as representantes dos catro municipios, unha delas, a de Lalín, infantil.
Na xuntanza desta tarde, o alcalde de Lalín, Xosé Crespo, afirmou que “a medida que perfilamos este proxecto colle corpo unha colaboración municipal sen precedentes en Galicia, que ademais racha cos tópicos das barreiras establecidas pola ideoloxía política e a división das provincias”, facendo referencia a que os fundadores desta agrupación proceden de distintos signos políticos (Lalín-PP, O Carballiño-PSOE e Melide e Monforte - BNG), e tamén das catro provincias galegas).
O alcalde de Monforte, Severino Rodríguez, insistiu en que “o traballo que se está desenvolvendo dende esta agrupación pode ser o principio dun camiño para contribuír a cambiar unha mentalidade demasiado localista que tradicionalmente ten habido en Galicia”. O alcalde nacionalista tamén dixo “atoparse cunha experiencia moi leal, porque apartamos as diferenzas para traballar en clave municipal”.
Pola súa banda, Carlos Montes, alcalde do Carballiño, insistiu en que se trata “dun proxecto de futuro para as zonas da Galicia central, para afondar en temas infraestruturais, e incluso movementos demográficos e reequilibrio territorial, pois é tamén un xeito de diagnosticar a nosa problemática e saír ao frente”.
A vindeira xuntanza do equipo de traballo de Galicia Central será o 29 de abril en Monforte de Lemos.
Fonte prensa concello de Melide
|
| [Volver] |
Inicio
Chat
Foros
Webs útiles
))